Spennandi bikar ÍF framundan
04.06.2013
Bikarkeppni Íþróttasambands fatlaðra í sundi (Blue Lagoon-bikarinn) fer fram í Sundlaug Akureyrar þann 8. júní næstkomandi. Meðal keppenda verður ólympíumeistarinn og -mótsmethafinn Jón Margeir Sverrisson. Íþróttafélagið Fjörður er ríkjandi bikarmeistari en félagið sigraði á heimavelli fyrir réttu ári eftir mikla baráttu við ÍFR og var það fimmti titill félagsins í röð. Í síðustu bikarkeppni féllu 14 Íslandsmet þannig að búast má við hörku keppni.
Keppnin hefst kl. 15 og útlit fyrir að veðurguðirnir brosi við þátttakendum og gestum.